GO→Local | Somórguiate na historia
Gozón nun termina na oriella de la mar. Costa ya interior guarden con arguyu la esencia de l’Asturies rural y marinera, onde la vida sigue ritmos sele, sabios y auténticos. Un tesoru compuestu poles lleendes de los pescadores que desafíen al Cantábricu, les romeríes qu’axunten a los vecinos nos praos y l’arguyu d’un patrimoniu sosteníu y protexíu demientres sieglos. Somorguiase no local ye entender que la hospitalidá ye’l nuesu mayor recursu y la tradición el nuesu meyor legáu. Nun vienes a observar una cultura, vienes a habitala.
Raíces que nos xunen Arquiteutura del tiempu:
descubri los hórreos, paneres y construcciones civiles qu’allumbren les nueses aldees, símbolos vivos de l’Asturies rural que curia les sos colleches, les sos raíces y la so historia.
Romeríes y cultura intanxible:
participa nes nueses fiestes tradicionales, onde la música de gaita, el baille y la devoción recuérdennos quién somos. Siente’l fervor marineru nes procesiones del Cristu del Socorru y les Fiestes de Nuesa Señora del Carmen, cola so emocionante procesión marítima fasta la islla. Déxate llevar pola maxa de les tradicionales romeríes de prau y fiestes sacramentales qu’enllenen l’añu, como les de Verdiciu, Bocines, Ambiedes, Bañugues, Heres (coles sos alfombres florales), Podes, Cardo o Nembro. Del desfile de la Cabalgata de Reis al misticismu de la Selmana Santa (cola Venia y Los Callandinos), pasando pol coloríu Corpus Christi, el folclor del Mercáu Medieval de Lluancu o’l divertíu Antroxu de branu, el calendariu ye un llatíu constante.
Hospitalidá compartida:
el valor de Gozón ta na so xente y na so mesa. Déxate guiar polos conseyos de los locales y comparte una sidra en cites úniques como’l Festival del Ouriciu en Bañugues, el Festival de la Xarda, el Festival del Bonitu, les tradicionales Calderaes, el Festival del Chipirón en Viodo o la emblemática Sardina en Cardo. Vive la fraternidá de la Gran Arrozada Popular nel cascu históricu o l’arraigu del Alcuentru de Mayores en La Mofosa. Sabori la historia duce del conceyu col Festival de La Marañuela en Selmana Santa, o somórguiate nes tradiciones de la mar y de la tierra cola Feria de Ganáu y la entrañable Selmana de la Mar. Descubri esos requexos que nun apaecen nos mapes, pero sí na memoria coleutiva del conceyu.
¿Cómo quies vivilo?
Un cientu d'esperiencies
