GO→Taste | Saborea lo que caltién
La gastronomía de Gozón ye una ancla sensorial que te coneuta direutamente cola tierra y l’océanu. Ye’l sabor inconfundible del marisco que crez nes roques batíes pol oleaxe montés de Cabu Peñes, combináu col calter honestu d’una ganadería y una agricultura tradicionales de proximidá.
El festín del Cantábricu Tesoros de la roca:
sabori’l marisco de la zona na so máxima espresión de frescura: la emblemática llagosta, la ñocla (boi de mar), el llocántaru, el cotizáu percebe o los codiciaos ouricios. Productos escelsos que saben a mar puru y que tienen el so momentu cume en cites tan arraigaes como’l afamáu Festival del Ouriciu en Bañugues nel aniciu de la primavera.
Pescaos de la nuesa rula:
de la costera del Bonitu del Norte en plenu branu al pixín, la xarda o’l congriu. La nuesa completísima oferta de restoranes, comedores y sidreríes convierte cada comida nun sinceru homenaxe al duru oficiu de los nuesos pescadores. Un tributu que se sabori a lo llargo de tol añu en xornaes temátiques indispensables: la tradicional Calderada de pataques y pescaos de roca, el Festival de la Xarda, l’esperáu Festival del Bonitu, el Festival del Chipirón en El Ferrero (Viodo) o’l tradicional Festival de la Sardina en La Ren (Cardo).
El duce de Gozón:
nun pues dicir con propiedá qu’estuviesti equí ensin probar les Marañueles. Estes deliciuses y cruxentes galletes de fornu cola so masa densa y les sos icóniques formes de llazu o caracola son l’auténticu símbolu duce de la nuesa identidá. Un legáu repposteru que s’exalta cada añu nel concurríu Festival de La Marañuela de Lluancu nos díes de Selmana Santa.
Cultura gastronómica:
en Gozón, la cocina vívese na calle y compártese col visitante. Siente la hospitalidá local en grandes celebraciones de hermandá culinaria como la Gran Arrozada Popular, que tiñe d’arume a paella asturiana tol cascu históricu de Lluancu, la tradicional costillada de les fiestes de Santiago y Santa Ana, o les degustaciones marineres de la Selmana de la Mar.
¿Cómo quies vivilo?
Un cientu d'esperiencies
